Korleis finn du fram på internett?
Internett inneheld mykje informasjon. Du treng ikkje kunna alt, men det er nyttig å vita korleis du finn det du leitar etter.
Nyttige ord
Ord | Forklaring |
Internett | Eit verdsomspennande nettverk som koplar saman datamaskiner, mobiltelefonar og nettbrett. |
Nettside | Ei side på internett som du kan opna, lesa eller bruka. |
App | Eit program du lastar ned til mobilen eller nettbrettet for å utføra bestemte oppgåver, til dømes Vipps eller NRK. |
Lenkje | Tekst eller ein knapp du kan trykkja på for å opna eit vedlegg eller ei ny side på nettet. |
Søkjefelt | Eit felt der du skriv det du leitar etter. |
Meny | Ei liste med val. |
Nettlesar | Eit program du brukar for å opna nettsider, til dømes Safari, Chrome eller Edge. |
Å finna fram på internett
Mange kan kjenne på at internett er som å koma til ein heilt ny by utan kart og kompass. Det finst mange knappar, ord og ting som rører seg på skjermen. Då er det heilt naturleg å bli usikker i starten.
Når du brukar internett, flytter du deg mellom ulike nettsider og appar. Du trykkjer på lenkjer, knappar og menyar for å finna fram til det du leitar etter. Litt etter litt blir det lettare å kjenna att korleis ting fungerar.
Det er viktig å ta det i eige tempo. Du treng ikkje forstå alt med ein gong.
Ting som er nyttige å vita
Ein knapp eller ei lenkje tek deg vidare til ei ny side eller meir informasjon
Eit søkjefelt blir brukt til å skriva det du leitar etter
Mange appar og nettsider har ei pil som peikar mot venstre. Trykkjer du på han, kjem du som regel tilbake til side du var på før sida du er på
Ver ikkje redd for å utforska. Viss du trykkjer feil, eller noko ikkje blir slik du tenkte, kan du som regel gå tilbake, eller lukka appen eller nettsida og starta på nytt
Å vera ny brukar på nettet
Mange opplever at internett blir lettare å bruka etter kvart som dei får litt erfaring. Det handlar ikkje om å vera «flink med data», men om å bli litt tryggare for kvar gong du prøver.
Hugs at alle har starta som nettbrukar ein gong. Brukan av digitale tenester i kvardagen gjer det lettare å vera brukar og å finna fram.
Tips:
Begynn med noko du synest er kjekt eller har nytte av. Det kan vera å sjå på bilete, høyra på musikk, lese lokalavisa, sjå ein video eller halda kontakt med familie og vener.
Kvar gong du brukar mobiltelefonen, får du litt meir erfaring. Den erfaringa tek du med deg vidare når du skal prøva andre digitale tenester.
Oppgåve: Motivasjon din for å bruka mobilen
Kva likar du å gjera i kvardagen? Skriv ei liste over interessene dine. Det kan til dømes vera matlaging, hagearbeid, fiske, strikking, reiser, musikk eller fotografering.
Sjå så på lista di. Korleis kan mobiltelefonen vera til nytte for deg? Skriv ned tre ting du har lyst til å læra eller bruka han til. Til dømes:
Eg vil læra å redigera bilete.
Eg vil høyra på lydbøker på telefonen.
Eg vil planleggja bussreiser med ei app.