Svindel med heimebesøk
Ver merksam på at svindel med heimebesøk finst – og lær kva du bør vera merksam på.
Nyttige ord
Ord | Forklaring |
|---|---|
Svindel med heimebesøk | Svindel der nokon oppsøkjer deg heime. |
Sensitive opplysningar | Informasjon som ikkje skal delast med andre. Til dømes kodar, passord og tilgangar som krev at du brukar BankID. |
BankID | Den personlege legitimasjonen din på internett. Med BankID kan du stadfesta kven du er og logga inn på digitale tenester på ein trygg måte. |
Nettside | Ei side på internett som du kan opna, lesa eller bruka. |
Telefonsvindel | Når svindel skjer over telefon. |
Teieplikt | Plikt til å halda informasjon hemmeleg. |
Ei vennleg påminning før du les
Svindel med heimebesøk kan verka litt skremmande å lesa om. Heldigvis er denne typen svindel mindre vanleg enn mange andre svindelmetodar, og det finst enkle grep som kan redusera risikoen for å bli lurt.
Målet med denne artikkelen er ikkje å skapa frykt, men å gjera deg merksam på at denne typen svindel finst. Viss nokon ringjer og gir seg ut for å vera frå banken, politiet eller ei anna kjend verksemd, bør du vera ekstra varsam. Ikkje gi frå deg BankID, passord eller andre sensitive opplysningar. Avslutt samtalen, og ring heller verksemda tilbake på telefonnummeret du finn på nettsida deira.
Kva er svindel med heimebesøk?
Svindel med heimebesøk er når svindlarar kjem heim til deg og gir seg ut for å vera nokon du kan stola på, til dømes frå politiet eller banken. Dei seier at dei skal hjelpa deg med å sikra pengane dine eller løysa eit problem, men målet er å stela pengar, bankkort, BankID eller andre verdisaker.
Denne typen svindel startar ofte med telefonsvindel. Svindlaren seier at kontoen din er i fare, og at politiet eller banken vil koma heim til deg for å hjelpa. Når nokon seinare ringjer på døra, er det ikkje politiet som kjem, men svindlarar. Dei kan også seia at du har teieplikt og ikkje har lov til å kontakta nokon. Målet deira er å koma seg inn i bustaden din for å få tilgang til bankkontoen eller bankkortet ditt, og eventuelt datamaskinen eller mobiltelefonen din, slik at dei kan stela pengar frå deg.
Hugs: Banken eller politiet vil aldri be deg oppgi BankID, henta bankkortet ditt eller koma heim til deg for å sikra pengane dine.
Kva skal du gjera?
Viss nokon ringjer og seier at politiet er på veg heim til deg, bør du ikkje stola på det dei seier med ein gong. Stopp, tenk og sjekk! Ring sjølv til politiet eller kontakt det lokale politikontoret ditt for å få stadfesta at besøket er ekte. Ikkje opna døra før du er sikker på kven som står utanfor. Svindlarar kan bruka politiuniformer eller falsk legitimasjon for å verka truverdege. Er du usikker, kontakt ein person du stolar på, til dømes eit familiemedlem eller ein nabo, og be dei koma til deg eller hjelpa deg med å vurdera situasjonen.