BankID

Lær kva BankID er, og korleis du brukar han på ein trygg måte.

📙

Nyttige ord

Ord	Forklaring
BankID	Den personlege digitale legitimasjonen din. Med BankID kan du stadfesta kven du er og logga inn på digitale tenester på ein trygg måte.
BankID-appen	Appen du brukar for å stadfesta at det er deg når du loggar inn eller signerer digitalt.
App	Eit program du lastar ned til mobilen eller nettbrettet for å utføra bestemte oppgåver, til dømes Vipps eller NRK.
Digitalisert	Noko som er gjort om slik at det kan brukast digitalt.
Digitalt	Noko som blir gjort ved hjelp av datamaskin, mobiltelefon eller nettbrett, ofte gjennom internett.

BankID er den personlege legitimasjonen din. Når du brukar BankID-appen, kan du stadfesta kven du er på nett på ein trygg måte. Appen gjer det òg mogleg å signera dokument digitalt.

Ved å bruka fødselsnummeret ditt og det personlege BankID-passordet du har valt, kan du logga inn på mange nettsider og digitale tenester.

⭐

Visste du at?

Over 80 prosent av dei som brukar BankID i Noreg, nyttar BankID-appen når dei loggar inn og stadfestar kven dei er på nett. Du er med andre ord i godt selskap når du lærer deg å bruka appen.

Kvar kan eg bruka BankID?

BankID blir brukt av mange verksemder og tenester som er viktige i kvardagen. Her er nokre døme:

Offentlege tenester:

Nav

Skatteetaten

Altinn

Bankar:

Alle norske bankar tilbyr innlogging med BankID.

Andre tenester:

Forsikring

Mobil

Straum

Nettapotek

Kort fortalt blir BankID ofte brukt når ei digital teneste treng å stadfesta at det er du som loggar inn eller godkjenner noko. Tenester som tek vare på viktig personleg informasjon, brukar BankID for å gjera tenesta ekstra trygg. Det er gjer tenesta tryggare for deg og organisasjonen du kommuniserer med.

Kva kan eg bruka BankID til?

BankID kan, som nemnt, brukast til å logga inn i nettbanken, i private tenester og på offentlege nettsider. Nokre kundesenter brukar òg BankID for å hjelpa deg raskare, ved at du stadfestar kven du er med BankID. Dette er noko du kan velja å gjera – ikkje noko du må.

Den same BankID-en kan brukast på tvers av mange stader der du er kunde. Det gjer det enklare, fordi du slepp å ha ulike innloggingsløysingar.

Med BankID kan du òg signera dokument elektronisk, slik at du slepp å møta opp personleg eller senda dokument i posten. Det sparar både tid og arbeid.

Nokre vanlege døme er å logga inn i nettbanken for å sjekka saldo, bruka Helsenorge for å sjå timeavtalar eller sjekka skattemeldinga.

⭐

Digitale løysingar kan gi større fridom, gjera kvardagen enklare og bidra til større sjølvstende.

Rettleiing: Slik loggar du inn med BankID

✍️

Oppgåve

Å øva på det du skal gjera i trygge omgjevnader, er ein god måte å læra på. Jo meir du øver, desto tryggare blir du.

I denne oppgåva kan du bruka BankID si øvingsside. Her kan du øva på å bruka BankID i eit trygt miljø som liknar ei vanleg innlogging. Du kan øva så lenge og så ofte du vil, utan å vera redd for å gjera feil eller sperra BankID-en din.

Øvingsside hos BankID: https://bankid.no/hjelp/testverktoey/test-identifisering

🎯 Mål: Øva gjennom repetisjon i eit øvingsmiljø som liknar den ekte tenesta.

💡 Hugs: Øvingssida er heilt trygg å bruka. Du kan øva så mange gonger du vil, og det er heilt umogleg å gjera feil.